Ururka Al Shabaab ayaa fagaaro ku yaallo Degmada Aadan Yabaal ee Gobolka Shabellaha dhexe waxa ay ku toogteen nin ay ku eedeeyeen inuu ahaa jaajuus.
Yaasiin Maxamuud Cumar ayaa lagu magacaabi jiray Ninka xukunka dilka toogashada ahaa ee Al-shabaab ku fulisay, waxaana xukuntay Maxkamadda Al-shabaab, isagoona la sheegay inuu qirtay inuu Sirdoon u ahaa Mareykanka.
Qaadiga maxkamadda Shabaab ayaa fagaaraha ka sheegay in Yaasiin uu qirtay Sirdoon inuu u ahaa Mareykanka, balse ma jirin qirasho cad oo Yaasiin meesha uu ka sheegay oo aan ka aheyn hadalka Qaadiga.
Ciidamada Shabaab ayaa durba rasaas la dhacay Yaasiin oo toogasho ku dilay, xilli ay daawanayeen Boqolaal ka mid shacabka ku nool Degmada Aadan Yabaal ee Gobolka Shabellaha dhexe.
Al Shabaab ayaa deeganada ay ka taliyaan ee Gobolada dalka Somaliya waxa ay ka fuliyaan xukunada noocaan oo kale ah oo aysan jirin cid difaaceysa ama u doodeysa shaqsiga eedeysanaha ah ee xukunada ay ku ridayaan Shabaab
Xafiiska Wararka,Muqdisho.
Info@aragticusub.com
