Soomaaliya waxay leedahay Dad naftooda u huray daryeelka bulshada, horumarinta dalka, iyo samafalka.
Mid ka mid ah shakhsiyaadkaas mudan in si gaar ah loo xuso waa Injineer Eenoow – halyeey u taagan horumarka dhabta ah, ganacsi daacad ah, iyo badbaadinta dadka Soomaaliyeed xilliyadii ay la ildarnaayeen abaaraha, colaadaha, iyo dhibaatooyinka bini’aadantinimo.
Waxbarashadiisa iyo Bilowgii Shaqadiisa
Injineer Eenoow wuxuu ku dhashay magaalada Muqdisho, halkaas oo uu ku dhammeystay waxbarashadiisii aasaasiga ahayd. Nasiib ayuu u yeeshay in uu waxbarasho sare ku helo dalka Talyaaniga, halkaas oo uu ka bartay cilmiga injineernimada. Markii uu dhameeyay heerka jaamacadeed, wuxuu si toos ah ugu laabtay dalkiisa Soomaaliya dhammaadkii sideetamaadkii, isagoo go’aansaday in aqoontiisa uu ugu adeego dadkiisa.
Markii uu dalka yimid, waxa uu si dhakhso leh uga dhex muuqday hormuudka dhismaha iyo horumarka, isagoo ka dhisay Muqdisho hoteello caan ah sida Maka Al-Mukarama, Ramadan, iyo kuwo kale, kuwaas oo sare u qaaday muuqaalka magaalada isla markaana abuuray fursado shaqo oo badan.
Dadaalkiisii Xilliga Dagaalada Sokeeye
Markii ay dalka ka bilaabmeen dagaalladii sokeeye, waxa uu ka doortay in uusan ka qaxin, balse uu kaalin muuqata ka qaato samata-bixinta dadkiisa. Mid ka mid ah talaabooyinkii ugu weynaa ee uu qaaday waxay ahayd isbedelka uu ku sameeyay xabsigii hore ee Keysaneey, kaas oo uu u beddelay isbitaal degdeg ah, taasoo sababtay in kumannaan qof helaan daryeel caafimaad oo muhiim ah.
Isbitaalkan wuxuu noqday astaan u ah gargaar bini’aadantinimo, wuxuuna ka mid yahay xarumaha caafimaad ee ugu waaweyn magaalada Muqdisho.
Ka Hortagga Musuqmaasuqa iyo Dhisidda Kaamam Cunto
Xilli ay dalka yimaadeen deeqo cunto ah oo loogu talagalay dadkii abaaruhu saameeyeen, waxaa bilowday musuqmaasuq baahsan. Ganacsato ayaa si gaar ah uga faa’iidaystay deeqahaas, taas oo keentay in dadkii loogu talagalay aysan helin wax ay cunaan.
Injineer Eenoow wuxuu si geesinimo leh uga horyimid nidaamkaas. Wuxuu hormuud ka noqday fikirka ah in cunnada la kariyo oo bilaash loo qaybiyo, halkii laga iibin lahaa. Wuxuu abaabulay kaamam cunto oo kumannaan qoys badbaadiyay, taasoo muujisay damiirkiisa samafaleed iyo himiladiisa ku aaddan daryeelka dadka baahan.
Dhisidda Ceelal Biyood iyo Dagaalka Oonka
Biyo la’aantu waxay ahayd mushkilad weyn oo Soomaaliya ka jirtay. Injineer Eenoow wuxuu ka mid ahaa dadka u taagnaa ka hortagga oonka iyo dhisidda ceelal biyoodyo. Wuxuu si gaar ah uga shaqeeyay ceelal laga qoday meelo ay abaartu si daran u saameysay, sida Ceel Qooxle, Ceel Macaan, iyo deegaano kale.
Ceelashaasi waxay badbaadiyeen nolosha dad badan, waxayna noqdeen ilo biyoodyo joogto ah oo bulshada faa’iido u leh.
Ganacsi iyo Shaqo Abuur Qaran
Injineer Eenoow ma ahan oo keliya samafale, balse sidoo kale waa ganacsade aqoon leh oo ka hawlgala guud ahaan dhulka ay Soomaalidu degto. Waxa uu mashruucyo horumarineed ka hirgeliyay magaalooyin kala duwan sida Berbera (Soomaaliland), Puntland, Dowlad-Deegaanka Soomaalida, iyo meelo kale oo dibadda ah.
Hawlahaasi waxay keeneen horumar muuqda iyo shaqo-abuur dhalinyaro badan oo Soomaaliyeed. Wuxuu mar walba aaminsanaa in dhalinyarada loo abuuro fursado ay kaga baxaan tahriibka, caajiska, iyo rajo-beelka.
Aragti Fog iyo Wadaniyad Daacad ah
Injineer Eenoow wuxuu ka mid yahay dadka aaminsan in mustaqbalka Soomaaliya uu ku jiro shaqo-abuur waara, horumar cilmiyeysan, iyo bulsho isku filan. Wuxuu tusaale u yahay sida ganacsi iyo samafal loogu wada adeegayo dad iyo dal, isagoo aan raadineyn sumcad ama abaalmarin, balse ficil ahaan wax ka beddelaya nolosha shacabka Soomaaliyeed.
Geesiyada dhabta ah waa kuwa aan hadal badan muujin, balse ficiladooda ay noqdaan kuwa lagu xasuusto. Injineer Eenoow waa halyeey Soomaaliyeed oo mudan in la xuso, la xurmeeyo, loogana mahadceliyo shaqadiisa. Waa nin si dhab ah ugu qalma in taallo loo dhiso isaga oo nool, si jiilasha dambe ay uga qaataan tusaale iyo dhiirigelin.
Soomaaliya waxay u baahan tahay dad u taagan waxqabad dhab ah, sida Injineer Eenoow – dad aan hadal uun ku ekaan, balse ficil ahaan u dhisa mustaqbal ifaya.
