Ciidamo ka tirsan Booliska dowladda Soomaaliya, gaar ahan Booliska & Nabadsugida ayaa waxaa ay xalay howlgallo ka sameeyeen Xaafado ka tirsan degmada Hodan ee Gobolka Banaadir, kuwaas oo dad badan lagu qabtay.
Howlgalka ayaa Ciidamada waxaa ay ka sameeyeen dhamaan Xaafadaha degmada Hodan, waxaana Ciidamada ay joojinayeen dadka wadooyinka maraya, iyaga oo qaarkood xiray, sidoo kale howlgalka uu ahaa mid guri guri ah.
Taliyaha Booliska degmada Hodan Bashiir Cabdi Siyaad ayaa sheegay in ujeedka howlgalka uu ahaa ka hortagga cid kasta oo liddi ku ah amniga, sida Al-Shabaab iyo Kooxaha Burcadda ah ee dhaca geysta.
Sidoo kale waxaa uu sheegay in howlgalka sidoo kale uu ahaa mid aad loogu adkeynayo amniga Caasimadda maadaama ay dhawaan bilaaban doonaan howlaha doorashooyinka, isla markaana howlgallada ay sii socon doonaan.
Howlgalkan Ciidamada Dowladda Soomaaliya ay xalay ka sameeyeen Xaafado ka tirsan degmada Hodan ee Gobolka Banaadir ayaa waxaa uu kusoo aadayaa xilli habeeno ka hor Ciidamada ay howlgal ka sameeyeen Xaafado ka tirsan degmooyinka Wartanabada & Boondheere ee Gobolkan Banaadir.
Xafiiska wararka Muqdisho
Info@aragticusub.com
