Hogaamiyaha Xisbiga Wadajir Party Cabdiraxmaan Cabdi Shakuur Warsame ayaa soo dhaweeyay Magacaabista Ra,iisal wasaaraha Cusub ee Soomaaliya
Qoraal uu soo dhigay Bartiisa Face buugga ayuu Cabdiraxmaan Cabdi shakuur Warsame uu kaga hadlay Magacbaaista Ra,iisal wasaaraha Cusub ee Soomaaliya Maxamed Xuseen Rooble
Qoraalka ayaa u qornaa sidaan:
Waxaan soo dhoweynayaa Ra,iisalwasaaraha cusub Injineer Maxamed Xuseen Rooble oo ah nin aan muddo aqaannay, kuna bartay dadnimo iyo wanaag, waxaan Ilaaheey uga baryeynaa in uu la garab galo xilka iyo masuuliyadda uu Soomaali u qaaday.
Mudane RW waxaad ku soo aadday xilli adag, xasaasina ah oo ay maalmo kooban ka harsantahay muddo xileedkii dowladda, laguna heshiiyey hannaankii doorashada oo heer Federaal ah.
Mudane, waqti badan ma haysatid, waxaadse heli kartaa fursad aad ku reebto raad togan iyo taariikh toolmoon, halbeegga hawshaaduna waa in aad dalka si nabad ah uga talaabisid xilliga kala-guurka ah ee shiidaadiisu badantahay . Waxaad ku soo beegantay xilli dadkii la kala irdheeyey, saamilaydii siyaasadeedna kala aamin baxeen, culayska ugu wayn ee aad wajahayso waa in aad ur u bixiso siyaasadda cakiran, is fahamna ka dhex abuurto siyaasiyiinta kala dhintay.
Madaxweynuhu wuxuu kaa rabaa in aad hormuud u noqoto ololahiisa doorashada, inta kalana waxey kaa rabtaa in aad u dhaxeyso oo aadan dhinacna u dheelliyin, meelmariso fulinta heshiiska doorashada kana fogaato wax kasta oo shaki abuuri kara ama dib u dhac keeni kara, kalana tashato saamilayda siyaasadeed dejinta jadwalka doorashada iyo dhismaha guddiyada.
Inkastoo xil qaran lagu magacaabay, haddana waxaad meteshaa dad miisaankoodii siyaasadeed maqanyahay iyo deegaan dhibteysan, taasina waxay kaaga baahantahay in aad muuqaal Raysalwasaare iyo mataalad siyaasadeed yeelato, kana feejignaato in aad dadkaada ka cararto, si aadan beri cidla u soo dhicin ayuu yiri Cabdiraxmaan Cabdi shakuur warsame Hogaamiyaha Xisbiga Wadajir.
Xafiiska Wararka,Muqdisho.
Info@aragticusub.com
